Tadhg Mac Dhonnagáin

Tadhg Mac Dhonnagáin

Photographer: Seán Ó Mainnín

Usage rights: COMHAR

Date: 24 November 2018

Setting: Spiddle, Co. Galway

Is scríbhneoir agus cumadóir amhrán é Tadhg Mac Dhonnagáin. Is as Achadh Mór i gContae Mhaigh Eo ó dhúchas dó agus tá cónaí ar an Spidéal air ón mbliain 2000 i leith. I measc na saothar atá tagtha uaidh tá an bheathaisnéis liteartha Mise Raiftearaí an Fíodóir Focal, leabhar a bhain Gradam Uí Shúilleabháin, Leabhar na Bliana 2015, agus an tsraith drámaíochta teilifíse don óige, Aifric, a raibh sé mar chomhchruthaitheoir agus príomhscríbhneoir air. Bhain an tsraith Gradam IFTA trí bliana as a chéile don chlár teilifíse is fearr in Éirinn don óige, 2007-2009 agus Gradam Fhéile na Meán Ceilteach i 2009.

I measc na leabhar do pháistí atá scríofa aige tá an scéal Rúraíochta Fleá Bhricriu (An Gúm, 1984), an tsraith mhiotaseolaíochta Fionn agus na Fianna, (An Gúm, 2006-2009), an pictiúrleabhar Uinseann Donn, (Futa Fata, 2013) agus an tsraith réamhscoile Dainín (Futa Fata, 2013-2014).

Chaith sé trí bliana déag mar láithreoir/tuairisceoir le RTÉ i mBaile Átha Cliath. I measc na gcláracha a raibh baint aige leo bhí an tsraith réamhscoile Dilín ó Deamhas, ar scríobh sé scripteanna chomh maith dó (1984-86), an t-irischlár Cúrsaí (1987-95) agus Cúrsaí Ealaíne (1995-2000). Bronnadh Gradam IFTA ar Cúrsaí Ealaíne sa bhliain 2000.

Tá dhá albam bunamhrán do dhaoine fásta cumtha agus taifeadta aige: Solas Gorm, (Gael Linn, 1988), agus Raiftearaí san Underground, (CIC, 1993) agus péire do pháistí: Ceol na Mara (Futa Fata, 2004) agus Bliain na nAmhrán (Futa Fata, 1997 agus athleagan i bhfoirm leabhair/dlúthdhiosca, 2016). Bronnadh Gradam Speisialta na Moltóirí ag na Children’s Books Ireland Book of the Year Awards 2017 ar Bliain na nAmhrán agus cuireadh san áireamh é i measc 200 scothleabhar na cruinne do pháistí, 2017, sa chatalóg ghradamúil White Ravens a fhoilsíonn an International Youth Library i Munich na Gearmáine. Bronnadh Gradam Réics Carló, Leabhar na Bliana don Óige air sa bhliain 2018.

Tá saothar Thaidhg aistrithe go Sínis (an pictiúrleabhar Uinseann Donn); go Briotáinis (an tsraith mhiotaseolaíochta Fionn agus na Fianna); go Danmhairgis agus go Faróis (an tsraith réamhscoile Dainín) agus go Spáinnis, Gàidhlig na hAlban, Portaingéilis, Turcais, Briotáinis agus Fairsis (an tsraith teilifíse Aifric).

Tá suim ar leith aige bheith ag plé go cruthaitheach leis an litríocht bhéil agus i measc na dtionscadal atá curtha i gcrích sa réimse seo oibre aige tá na leabhair/dlúthdhioscaí do pháistí Gugalaí Gug! (Futa Fata, 2005) agus Peigín Leitir Móir (Futa Fata, 2008, eagrán nua 2018) agus an cnuasach do dhaoine fásta, Aniar (Futa Fata, 2007).

Is é a bhunaigh an teach foilsitheoireachta Futa Fata atá i mbun oibre sa Spidéal, i nGaeltacht Chonamara, ón mbliain 2005 i leith. 

Birth date: 1961

Share this portrait: